Domingu Ramus Simbolu husi Vitória
Loron ohin, Domingu 5 de Abril 2020, ita selebra hanesan Domingu Ramus. Domingu Ramus hanesan loron selebrasaun ba Sarani Katolika, hodi hanoin hikas tempu Nai Jesus Kristus tama iha cidade Jerujalem. Selebrasaun Domingu Ramus ne’e hatudu liu ba eventu ne’ebe hakerek ona iha Biblia, liu-liu iha evangelhos sinóticos: Markus 11:1-11, Matius 21:1-11, Lukas 19:28-44 no mos João 12:12-19. Iha komemorasaun ne’e halo ita hanoin hi’as eventu ne’ebe Nai Jesus tama ba cidade Jerujalem molok Nia terus no mate iha krus. Objektivu Nai Jesus tama ba Jerujalem hanesan buat ida ne’ebe espesial, tanba akontesementu molok Nai Jesus mate no moris hi’as husi mate. Ho ida ne’e mak Domingu Ramus sai hanesan loron abertura ba Semana Santa, ne’ebe fokadu ba semana ikus Jesus iha cidade Jerujalem. Iha liturgia Domingu Ramus, sarani hotu lori ramus no iha igreja laran nakonu ho ornamentu ramus.
Ramus hanesan simbolu husi vitória, no lori mos sentidu ba iha parte simbolu Kristaun nian vitória. Uza ramus atu hodi dehan vitória mártir ba mate, mártir ita fo dejeina hanesan ramus, fatin no istrumentu husi martírio. Kristus hatudu relasaun ramus ho simbolu vitória ba sala no mate (João 12:12-13). Iha Jerusalem Jesus ema simu ho haksolo no iha Jerujalem mos Jesus simu no lori terus tomak.
Loron Domingu Ramus ne’e, sarani tomak hi’it ramus hodi hakilar, hananu hosanna leten as. Selebrasaun ida ne’e hanesan tali ne’ebe hametin ita nia partisipasaun hamutuk nu’udar sarani. Ita loron ne’e ita hotu-hotu hetan oportunidade atu sai manan nain iha moris dame nian. Domingu Ramus, Igreja laos deit selebra loron dahuluk Jesus tama ba Jerujalem, maibe selebra mos hanesan domingu terus nian ba Jesus. Jesus hatudu nia domin tomak hodi sai Salvador ba ita sarani tomak. Tanba domin Nia fo Ninia vida tomak sai hanesan Vitoria mai ita.
Iha moris loron-loron ita hasoru no hetan esperensia oin-oin. Iha esperensia diak no mos iha esprensia ne’ebe la diak. Maibe ita sente hasolok hela tanba grasa moris ne’e hanorin ita atu sai manan nain ba moris ne rasik. Moris katak dezafiu – hasoru ba; Moris katak furak – admira ba; Moris katak akontesimentu – tanis ba; Moris katak servisu – badinas ba ; Moris katak misteriu – hakfodak ba; Moris katak hakarak – realize ba; Moris katak kompetisaun –kompete ba; Moris katak promete – hakonu ba; Moris katak sasi’ik – si’ik ba; Moris katak viajen – la’o ba; Moris katak grasa – hahi ba. Moris ne’e naroman husi domin. Domin mak sai hanesan parte importante ida iha moris. Se moris mai husi domin, hadomi ba moris ne’e. Agradese ba ho moris ne’e, tanba moris ne’e grasa Maromak nian, ho ida ne’e iha moris loron-loron ita la moris mesak tanba Maromak sempre hela ho ita.
No comments:
Post a Comment